Në një rrëfim të parë dhe prekës për televizionin grek MEGA, Anastasia, vajza 18-vjeçare e Pandeli dhe Marjola Nakolecit, ka folur për tragjedinë që i mori nënën dhe i burgosi babanë. Mes lotësh, ajo tha se i konsideron të dy prindërit fajtorë për ngjarjen, duke theksuar se ata i lanë në rrugë katër fëmijët e tyre.
“Të dy janë fajtorë për mua. Na lanë në rrugë, nuk menduan fare për ne,” rrëfeu Anastasia. Ajo shpjegoi se grindjet mes prindërve kishin nisur pasi babai kishte zbuluar mesazhe në telefonin e nënës së saj, e cila kishte një lidhje intime me një tjetër burrë. “Ai na u fut në rrugë dhe na shkatërroi të gjithë familjen,” tha ajo, duke iu referuar burrit tjetër.
Anastasia tregon se pak ditë para tragjedisë, familja kishte qenë me pushime dhe gjithçka dukej normale. “Nuk doja që kjo të ndodhte. Nuk e mendova kurrë,” tha ajo. Vajza theksoi se babai i saj ishte shumë xheloz, por kurrë i dhunshëm. “Ai nuk ishte i dhunshëm. Ai ishte shumë xheloz, ka kuptim sepse nëna ime foli me dikë që nuk duhej,” shtoi ajo.
Ajo kujtoi edhe momentin kur mori vesh lajmin tragjik nga vëllai i saj, si dhe bisedën e fundit me të atin, i cili i tha në arrati: “Nuk doja, nuk doja ta bëja këtë.”
E reja pranon se është një dhimbje e madhe të jetojë pa dy prindërit e saj, duke u munduar të përballojë realitetin e ri. “Më mungon mami. Qaj çdo ditë. Shikoj fotot dhe nuk e besoj ende,” përfundoi ajo, duke lënë të hapur pyetjen nëse do të vizitojë babanë e saj në burg.