Një ngjarje e rëndë dhe jo profesionale ka tronditur ambientin e Policisë së Shtetit në Berat, ku dy agjentë të Shërbimit Operacional janë përfshirë në një debat të ashpër, që ka kulmuar me nxjerrjen e armës nga njëri prej tyre.
Siç raportohet, ngjarja ndodhi dje, kur agjenti Muhamet Lana ka kanosur kolegun e tij, Partizan Lumi, duke i thënë “të mbush barkun me plumba”. Konflikti dyshohet se ka nisur për shkak të transferimit të Partizan Lumit nga Seksioni Operacional në Drejtorinë e Policisë Berat, në Komisariatin e Poliçanit.
Transferimi i Lumit i hapi rrugën Muhamet Lanës për të zënë pozicionin e tij. Sipas burimeve, Lana është mik i ngushtë i zv.drejtorit të Hetimit të Krimeve në Berat, Shkëlqim Xhezairaj.
Incidenti ndodhi pikërisht përballë Drejtorisë së Policisë Berat dhe ka përfunduar në dyert e Agjencisë së Mbikëqyrjes Policore (AMP), pasi Partizan Lumi ka bërë një kallëzim penal. Çështja tashmë është nën hetim dhe prokurori i gatshëm i Beratit pritet të njihet me materialin referues në ditët në vijim.