Të paktën 15 persona kanë humbur jetën dhe 16 të tjerë rezultojnë të zhdukur si pasojë e shirave të rrëmbyeshëm dhe rrëshqitjes së dheut që kanë goditur zonën e Uttarakhand në Indi. Fatkeqësia ka shkaktuar dëme masive, duke marrë me vete biznese, rrugë dhe banesa.
Media të ndryshme kanë publikuar pamje nga terreni, ku shihen pasojat e rënda të motit të keq, ndërsa banorët kanë mbetur pa strehë. “Dyqanin tim e mori uji,” u shpreh një banor i zonës për agjencinë e lajmeve ANI.
Gazeta “Indian Express” raportoi se 13 trupa u gjetën të martën në Dehradun, ndërsa një trup në distriktin Pithoragarh dhe një në Nainital.
Zona e Uttarakhand njihet për përmbytjet dhe rrëshqitjet e shpeshta të dheut, të cilat, sipas ekspertëve, janë një pasojë e drejtpërdrejtë e ndryshimeve klimatike. Ky incident tragjik vjen pas një tjetër fatkeqësie të ngjashme në gusht, ku një rrëshqitje dheu në fshatin Darali la 60 persona të zhdukur.