Një tragjedi e rëndë ka ndodhur në Mesdheun Qendror, ku të paktën 61 persona, përfshirë gra dhe fëmijë, kanë humbur jetën pas përmbysjes së një varke me migrantë pranë brigjeve të Tobrukut, në verilindje të Libisë. Lajmi u konfirmua të mërkurën nga Komisioneri i Lartë i Kombeve të Bashkuara për Refugjatët (UNHCR).
Sipas UNHCR, varka po transportonte 74 persona, të gjithë shtetas sudanezë, dhe vetëm 13 prej tyre kanë arritur të mbijetojnë. Varka ishte nisur nga qyteti bregdetar Zuwara në perëndim të Libisë.
Rreziqet e rrugës së Mesdheut dhe konflikti në Sudan
Agjencitë e OKB-së theksuan se “Mesdheu Qendror mbetet një nga rrugët më të rrezikshme të migracionit në botë” dhe bënë thirrje për veprim ndërkombëtar për t’i dhënë fund këtyre tragjedive.
Për t’i dhënë zgjidhje afatgjatë krizës, ata kërkojnë ndërprerjen e luftës në Sudan, e cila ka detyruar mijëra qytetarë të largohen nga vendi. Konflikti mes ushtrisë sudaneze dhe Forcave të Mbështetjes së Shpejtë (RSF), që ka nisur në prill të vitit 2023, ka përshkallëzuar ndjeshëm situatën humanitare, duke i bërë udhëtimet e rrezikshme drejt Evropës zgjidhjen e vetme për shumë njerëz.