Një libër i ri nga gazetari investigativ italian Nello Trocchia, botuar në gazetën Domani, ka zbuluar detaje shokuese rreth një takimi sekret të mbajtur në janar të vitit 2019 në ishullin e Arubës, në Antilet Holandeze. Sipas dokumenteve hetimore antimafia, në këtë takim dyshohet se kanë marrë pjesë një bos i njohur i krimit ndërkombëtar, biznesmenë dhe “përfaqësues të papërcaktuar të qeverisë aktuale shqiptare në detyrë”.
Samiti misterioz në Karaibe
Sipas dokumenteve të hetuesve italianë, të cilat u morën gjatë një hetimi që u mbyll pa proces gjyqësor në Itali për shkak të kompleksitetit, por që po vazhdon në vende të tjera evropiane, takimi në Aruba kishte një qëllim specifik: diskutimin e një lejeje ndërtimi për një “kullë në Tiranë”. Të dhënat sugjerojnë se toka ku do të ndërtohej kulla ishte në pronësi të dy grupeve kriminale.
Në takim dyshohet se ishin të pranishëm figura të rëndësishme nga bota e krimit, përfshirë Artur Shehun, i cilësuar nga hetuesit si “kryetar i padiskutueshëm i një organizate kriminale shqiptare me degë në Evropë dhe Shtetet e Bashkuara”, dhe Genci Hamzai (alias Alfredo Hamzai), një trafikant droge, si dhe “burra të panjohur të lartë të politikës shqiptare”.
Përgjimet telefonike dhe informacione nga policia gjermane e konfirmojnë ekzistencën e këtij takimi, i cili u mbajt në një vend sekret ku nuk kërkohet vizë për hyrje, pikërisht për të shmangur kontrollet.
Profili i “Perandorit” Artur Shehu
Nello Trocchia i kushton një pjesë të madhe të librit të tij figurës së Artur Shehut, duke e portretizuar si një “perandor” i krimit dhe biznesit. Shehu ishte një i mbijetuar i trazirave të vitit 1997 në Shqipëri dhe u bë i njohur për drejtimin e rrjeteve të trafikimit të njerëzve me gomone drejt Italisë. Më pas, ai u zhvendos në SHBA, në Miami Beach, ku jeton edhe sot.
Emri i tij është i lidhur me biznese të ndryshme, përfshirë ato me një prej mbretërve të mafies italiane, Albino Prudentino. Ai gjithashtu ka investuar në lojëra fati dhe pasuri të paluajtshme në Shqipëri, veçanërisht në Vlorë, ku bizneset e tij kanë vazhduar me miratimin e qeverisë aktuale.
Sipas hetuesve, Shehu dhe bashkëpunëtorët e tij përdorin një metodë të sofistikuar për të pastruar paratë e krimit: ata marrin kredi në Shqipëri, duke i përdorur paratë për investime të ligjshme në vende si Italia, duke shmangur kështu kontrollet e autoriteteve financiare. Kjo strategji i bën ata “të pathyeshëm”.
Gazetari italian i ka dërguar pyetje kryeministrit Rama për të marrë një përgjigje në lidhje me këtë takim, por nuk ka marrë ndonjë reagim. Shqetësimi i madh qëndron në pyetjen se si një figurë e tillë kriminale dyshohet se ka arritur të ndikojë në vendimet e niveleve më të larta politike në Shqipëri.