Një ngjarje e bujshme ka tronditur mediat turke. Huseyin Gunay, korrespondent i stacionit televiziv pro-qeveritar NTV në Uashington, është shkarkuar menjëherë nga detyra pasi u kap nga kamerat duke kritikuar presidentin e Turqisë, Rexhep Tajip Erdogan, gjatë një takimi me presidentin amerikan Donald Trump.
Sipas raportimeve të portalit Turkish Minute, Gunay është dëgjuar duke thënë se Erdogan “nuk fitoi asgjë” nga ky takim, një koment i konsideruar si i papranueshëm nga linja editoriale e kanalit dhe nga strukturat pro-qeveritare.
Luftë pushteti pas kulisave
Në të njëjtin regjistrim, gazetari flet edhe për një luftë të trefishtë për pushtet brenda elitës politike dhe familjare që rrethon Erdoganin. Ai përmend emra me peshë: ministrin e Jashtëm Hakan Fidan, djalin e presidentit Bilal Erdogan, si dhe dhëndrin e fuqishëm Selçuk Bayraktar – inxhinier i njohur dhe producent i dronëve ushtarakë. Gunay lë të kuptohet se rivaliteti mes tyre është i lidhur me kontrollin e Turqisë në një të ardhme “post-Erdogan”, një temë tabu në mediat pranë pushtetit.
Një ditë e hidhur në mes të gëzimit
Ironikisht, shkarkimi i tij erdhi në një ditë kur Gunay kishte shpërndarë një lajm personal të gëzueshëm. Përmes një postimi në platformën X (Twitter), ai njoftoi se ishte bërë baba.
“Sot kam fatin e keq të jem në një pozicion ndryshe në agjendë, por ka një lajm që mezi prisja ta ndaja me ju, sepse dua të ndjeni gëzimin tim: U bëra baba. Që tani e tutje, do të më thërrisni Hüso Baba”, shkroi ai.
Shkarkim me mesazh politik
Rasti i Gunay shihet gjerësisht si një shembull i mungesës së lirisë së fjalës në Turqi dhe i kontrollit të rreptë që ushtron pushteti mbi median. Kritikat ndaj Erdoganit dhe sidomos diskutimet mbi një epokë pas tij, konsiderohen të papranueshme. Shkarkimi i menjëhershëm i korrespondentit tregon edhe një herë se, në Turqi, gazetaria mbetet një profesion i rrezikshëm kur ndeshet me vijën e kuqe të pushtetit.