Tiranë – Detaje të reja po dalin në dritë lidhur me hetimet e SPAK-ut për aferën e tenderave që përfshiu Zëvendës Kryeministren dhe Ministren e Infrastrukturës dhe Energjisë, Belinda Balluku, e cila u pezullua nga detyra.
Gazetarja Klodiana Lala ka deklaruar se Balluku, përveç komunikimeve me ish-vartësin e saj, Evis Berberi, i cili ishte në qendër të dosjes së Tunelit të Llogarasë, komunikonte paralelisht edhe me Kryeministrin Edi Rama në lidhje me këta tendera.
Ky detaj sugjeron një nivel të lartë të koordinimit të informacionit për procedurat e prokurimit publik.
Deklarata e Lala-s vjen ndërkohë që hetimet e SPAK janë duke u thelluar pas sekuestrimit të celularëve dhe zbardhjes së komunikimeve, të cilat çuan në vendosjen e masave të sigurisë ndaj Ballukut dhe ish-vartësve të saj.