ELBASAN – Një ngjarje tragjike ka tronditur fshatin Mlizë, ku një 39-vjeçar humbi jetën pasi u mbyt në përroin që kalon pranë zonës.
Viktima, e identifikuar si Ilia Tahiri, dyshohet se ka qenë në gjendje të dehur në momentin kur ka rënë në ujë, sipas të dhënave paraprake nga grupi hetimor.
Kërkime gjatë gjithë natës – trupi u gjet në mëngjes.
Familjarët kanë njoftuar policinë mbrëmjen e së mërkurës, më 26 nëntor, rreth orës 20:00, pasi 39-vjeçari ishte larguar nga banesa një ditë më parë, rreth orës 13:00, dhe nuk ishte kthyer më.
Menjëherë pas denoncimit, forcat e Policisë së Elbasanit, të mbështetura nga zjarrfikësit dhe grupet e emergjencave civile, kanë nisur kërkimet intensive në zonë.
Pas patrullimeve të pandërprera gjatë natës, trupi i pajetë i Tahirit u gjet mëngjesin e sotëm në një përrothë në fshatin Kryezjarr, vetëm pak kilometra larg vendbanimit të tij.
Dyshimet paraprake
Sipas njoftimit zyrtar të Policisë së Shtetit: “Nga veprimet e para hetimore dyshohet se 39-vjeçari ka rënë aksidentalisht në përrua dhe për pasojë është mbytur.”
Autoritetet po vijojnë hetimet për të sqaruar rrethanat e plota të ngjarjes, ndërsa trupi i viktimës është dërguar për ekzaminime të mëtejshme mjeko-ligjore.