Kolegji i Gjykatës Kushtetuese eshte mbledhur duke marre nje vendim te cuditshem sa i perket kerkeses se qeverise per vleresimin e mases se sigurise te dhene nga GjKKO me kerkesen e SPAK, e cila flet per pezullimin e zevendeskryeministres Belinda Balluku.
Megjithate, Kolegji i Gjykatës Kushtetuese nuk ka marrë një vendim përfundimtar në seancën e sotme lidhur me kërkesën e qeverisë për pezullimin e urdhrit të GJKKO-së, që largoi nga detyra zëvendëskryeministren dhe ministren e Infrastrukturës dhe Energjisë, Belinda Balluku.
Treshja e gjyqtarëve të Kolegjit, e përbërë nga Marsida Xhaferllari, Sander Beci (relator i çështjes) dhe Sonila Bejtja, vendosi që të mos shprehet sot për çështjen, duke e shtyrë diskutimin për javën e ardhshme.
Seanca e radhës është caktuar për datën 2 dhjetor, ku pritet të shqyrtohet nëse kërkesa e qeverisë plotëson kriteret procedurale dhe kushtetuese për t’u marrë në trajtim nga Gjykata Kushtetuese.
Pse është në Kushtetuese çështja Balluku
Qeveria i është drejtuar Gjykatës Kushtetuese pasi kundërshton vendimin e Gjykatës së Posaçme (GJKKO), e cila vendosi pezullimin e Ballukut nga të gjitha funksionet ekzekutive, përfshirë postin e zv.kryeministres dhe të ministres së Infrastrukturës dhe Energjisë.
Kabineti qeveritar e konsideron këtë një ndërhyrje të papranueshme në pushtetin ekzekutiv, duke argumentuar se një masë e tillë cenon parimin e ndarjes së pushteteve dhe kompetencat e qeverisë për organizimin e brendshëm.
Çfarë pritet të ndodhë?
Seanca e 2 dhjetorit do të jetë vendimtare për të kuptuar nëse Gjykata Kushtetuese do ta kalojë apo jo çështjen në shqyrtim të plotë. Kjo nënkupton:
analizën e ligjshmërisë së vendimit të GJKKO-së
vlerësimin e pretendimeve të qeverisë për cenim të ekzekutivit
përcaktimin nëse pezullimi i një zyrtari të lartë qeveritar hyn apo jo në kompetencat e GJKKO-së
Në ditët në vijim pritet që Gjykata Kushtetuese të japë komunikime të tjera mbi ecurinë e çështjes, e cila mbetet një nga më të rëndësishmet e muajve të fundit në raportin mes pushteteve dhe balancave institucionale në vend.