Evropa mund të përballet me mungesa të karburantit për avionët nëse Ngushtica e Hormuzit nuk rihapet brenda tre javëve të ardhshme, sipas organit tregtar për aeroportet evropiane.
ACI Europe u ka shkruar Komisionerëve Evropianë për energjinë dhe turizmin, duke paralajmëruar për “shqetësime në rritje” midis anëtarëve të saj në lidhje me disponueshmërinë e karburantit për avionët.
“Një krizë furnizimi do të prishte rëndë operacionet e aeroportit dhe lidhjen ajrore , me rrezikun e ndikimeve të ashpra ekonomike për komunitetet e prekura dhe për Evropën. Në këtë fazë, ne e kuptojmë se nëse kalimi nëpër Ngushticën e Hormuzit nuk rifillon në ndonjë mënyrë domethënëse dhe të qëndrueshme brenda tre javëve të ardhshme, mungesa sistematike e karburantit për avionë do të bëhet realitet për BE-në.”, shkroi drejtori i përgjithshëm i ACI Europe.
Gjiri është një burim i madh i karburantit të aviacionit, duke përbërë rreth 50% të importeve të Evropës.
Disa linja ajrore kanë ulur tashmë fluturimet dhe kanë rritur tarifat e pasagjerëve për shkak të shqetësimeve për mungesën e karburantit.
Javën e kaluar, çmimi referues i karburantit për avionët evropian arriti nivelin më të lartë prej 1,838 dollarësh për ton, krahasuar me 831 dollarë para fillimit të luftës.