Makina e biznesmenit Rexhep Ismaili ka mbetur në mes të rrugës, përpara karburantit që ai dhe vëllezërit zotëronin në kryqëzimin e fshatit Gjashtë të Sarandës, ndërsa Policia e ka rrethuar me shiratat “skenë krimi”, raporton newsbomb.al.
Grupi hetimor ka administruar pamjet e kamerave të sigurisë së biznesit të 66 vjeçarit dhe ajo që mësohet me dije paraprakisht, është se bëhet fjalë për një konflikt të çastit që ka çuar në përdorimin e armës së zjarrit.
Rexhep Ismaili është konfliktuar me disa persona dhe njëri prej tyre ka nxjerrë armën e zjarrit duke e qëlluar me një plumb në kokë.
Ngjarja ka ndodhur rreth orës 22:00 përpara karburantit “Vëllezërit Ismaili”, në kryqëzimin apo rrethrrotullimin e Gjashtës (vendasit e njohin zonën edhe si Qafa e Gjashtës për shkak të terrenti dhe rrugës automobilistike që përshkon kodrën.
Fatkeqësisht, predha ka rezultuar fatale dhe biznesmeni dhe kryetari i degës lokale të Shoqatës Patriotike “Çamëria” ka ndërruar jetë në vendngjarje. Familjarë dhe banorë të zonës janë tronditur nga ngjarja dhe po japin dëshmi për të ndihmuar në hetime.
Newsbomb.al ka siguruar një fotografi të viktimës, ndërsa ekzekutimi makabër i tij ka tronditur qytetin e Sarandës, i cili tashmë është futur zyrtarisht në sezonin veror dhe mirëpret pushues dhe turistë të shumtë.
Mësohet se Rexhep Ismaili me origjinë është çam dhe gjashtë vite më parë, në 2020, është zgjedhur kryetar i Degës së Patriotike Atdhetare “Çamëria”, në Sarandë. Ai gëzonte respekt në qytetin bregdetar dhe deri tani, dyshimet janë se vrasja ka ardhur si pasojë e një konflikti të çastit.
© Newsbomb.al