Nëna e saj, Mireille Verhoof, e mbështeti vendimin…Milou Verhoof, një adoleshente nga Holanda, zgjodhi t’i japë fund jetës në moshën 17-vjeçare përmes eutanazisë, një praktikë e ligjshme në vend. Milou iu drejtua psikiatrit Menno Oosterhoff, i njohur për asistencën në rastet e eutanazisë psikiatrike tek të rinjtë. Ai administroi injeksionin fatal në dhomën ku ajo kishte kaluar fëmijërinë, ndërsa Milou ishte përgatitur me kujdes për momentin, duke zgjedhur edhe veshjen për ceremoninë e saj.
Nëna e saj, Mireille Verhoof, e mbështeti vendimin, duke theksuar se ishte zgjedhja e duhur për vajzën dhe familjen. Adoleshentja kishte përjetuar trauma të shumta, përfshirë humbjen e vëllait nga një sëmundje e rëndë, përdhunimin në moshën 13-vjeçare dhe depresion të thellë që e kishte çuar në përpjekje të dështuara për vetëvrasje dhe vetë-dëmtim.
Dokumentari Beteja e Milou-së ka ndjekur historinë e saj dhe debatet që pasuan, duke nxitur diskutime mbi mundësinë e eutanazisë për adoleshentët me probleme të shëndetit mendor.
Ligji holandez për eutanazinë, i miratuar në vitin 2002, lejon mjekët të asistojnë pacientët që kërkojnë ndërprerjen e jetës në mënyrë vullnetare dhe të menduar mirë, kur vuajtjet janë të padurueshme dhe pa perspektivë për përmirësim. Edhe pse shumica e rasteve lidhen me sëmundje fizike terminale, rastet psikiatrike janë në rritje, duke kaluar nga 88 në vitin 2020 në 219 në vitin 2024.