Një nga problematikat që përballen të rinjtë shqiptarë është edhe konsumimi i lënëve narkotike, pasi shifrat e konsumatorëve të drogërave vijojnë të jenë në rritje të vazhdueshme.
Mjekja toksikologe Sonila Tivari Bitri, ka ngritur alarmin se kanabisi nis në mosha të hershme dhe po shërben si substancë trampolinë për kalimin në drogëra të forta.
“Ajo çfarë shohim si trend është se nëse kanabisi ka qenë substancë e parë e konsumuar dhe më e shpeshtë edhe në mosha të vogla tani po prevalon konsumimi I kokainës edhe në mosha të vogla. Shohim gjithashtu që ulja e moshës së përdorimit të kokainës shton edhe më tej problematikat e shëndetit fizik, moral, mendor“, tha ajo për Euronews Albania.
Më tej Tivari deklaron se kanabisi po pihet edhe nga fëmijët, ndërsa kokaina sipas saj nuk quhet më susbstancë elitare.
“Kanabisi dhe 11-12 vjeç, kokaina 20 vjeç, 18 vjeç, ndërkohë që deri para 5 vitesh kokaina është konsideruar susbstancë elitare si në moshë si në status social, pra jo çdokush mundet të konsumojë kokainën , tani po shohim që dhe adoleshentë po e konsumojnë kokainën. Shpesh herë janë dhe në rrjetin e shpërndarëve kështu që e ke më të lehtë se bëhet mjet pune le të themi”, shtoi ajo.