Një ngjarje e rëndë është regjistruar mëngjesin e kësaj të shtune në Durrës, ku një 31-vjeçar është gjetur pa shenja jete në afërsi të mbikalimit të Shkozetit.
Sipas burimeve policore, trupi i të riut është konstatuar në anë të rrugës nga kalimtarë të rastit, të cilët kanë njoftuar menjëherë shërbimet e emergjencës dhe policinë. Në vendngjarje mbërriti ambulanca, ndërsa 31-vjeçari u transportua drejt spitalit, ku mjekët konfirmuan se ai kishte ndërruar jetë.
Nga veprimet paraprake hetimore mësohet se viktima ishte banues në Shijak. Dyshohet se mëngjesin e sotëm ai është ndjerë keq nga ana shëndetësore dhe ka marrë automjetin për t’u nisur drejt spitalit të Durrësit për të kërkuar ndihmë mjekësore.
Megjithatë, pa arritur të futet në qytetin e Durrësit, gjendja e tij dyshohet se është rënduar ndjeshëm. Burimet bëjnë me dije se 31-vjeçari ka ndaluar automjetin në anë të rrugës dhe ka dalë prej tij, por pak çaste më vonë është rrëzuar.
Paraprakisht dyshohet se shkak i vdekjes ka qenë një arrest kardiak, ndërsa pritet ekspertiza mjeko-ligjore për të përcaktuar me saktësi shkaqet e humbjes së jetës.
Policia vijon hetimet për zbardhjen e plotë të rrethanave të ngjarjes.