Kërkesa e mbërritur në redaksinë e JOQ Albania nga disa banorë të një pallati në rrugën “Riza Cerova” në Tiranë ka shkaktuar reagime dhe buzëqeshje në rrjet për shkak të natyrës së pazakontë të ankesës.
Banorët, të lodhur nga zhurmat që vijnë nga një apartament në katin e katërt, kanë vendosur t’i drejtohen me një letër publike komshies së tyre, duke shprehur shqetësimin për rënkimet dhe ulërimat që, sipas tyre, dëgjohen në të gjithë shkallën e pallatit. Letra, e cila është ngjitur në hyrje të pallatit, ka një ton ironik, por njëkohësisht qartësisht i irrituar nga mungesa e qetësisë.
Në letër thuhet:
“Thirrje komshies që i vlon gjaku në katin e katërt.
E dashur komshie, e kuptojmë që jeta ka edhe momente pasioni, por të lutemi mbaje qejfin për vete ose zgjidh një orar që nuk shqetëson gjysmën e pallatit. Nëse nuk i mban dot rënkimet dhe ulërimat përbrenda, të paktën bëji pas mesnate ose dil me qira diku tjetër.
Në të kundërt, do të merremi me kollovarin.”
Këshilli i Banorëve të Pallatit
Ky veprim ka ndarë opinionin publik, ku disa e kanë cilësuar si një mënyrë argëtuese për të adresuar një problem real, ndërsa të tjerë kanë ngritur pyetjen mbi privatësinë dhe kufijtë e tolerancës në komunitet.
Megjithatë, duket se këshilli i banorëve ka zgjedhur një mënyrë jo të zakontë për të tërhequr vëmendjen e komshies dhe, ndoshta, për të sjellë pak më shumë qetësi në mjedisin e përbashkët të pallatit.
