Protesta qytetare e nisur prej orësh 18:00 në bulevardin qendror të Tiranës, vazhdon prej 5 orësh dhe tashmë është shtrirë në disa nga rrugët dhe sheshet kryesore të kryeqytetit, ashtu siç është bërë traditë prej 12 ditësh.
Me flamuj kombëtarë në duar dhe bula kuqezi, ata këndojnë në korë edhe këngë patriotike, ndërsa drejtuesit e mjeteve i përshëndesin dhe i shoqërojnë me bori.
“Rama n’burg, Berisha n’burg” është një tjetër nga thirrjet e qytetarëve, të cilët shprehin revoltën me klasën aktuale politike, të cilën e akuzojnë për praprambetjen 35 vjeçare të Shqipërisë, duke kërkuar largim.
Pjesëmarrja e qytetarëve në këtë protestë që po shndërrohet historike dhe ka zgjuar mbarë popullin tonë, është madhështore duke pritur në gjirin e saj qindra shqiptarë që kanë udhëtuar nga diaspora.
I ashtuquajturi “Revolucion i Flamingove” është bërë zëri dhe shpresa e mijëra qytetarëve që ndodhen në bulevardin “Dëshmorët e Kombit”, ndërsa mijëra të tjerë, në mos miliona, i japin shpërndarje masive në rrjetet sociale.