Me urdhër të kryeministrit Edi Rama ka nisur heqjen e gurëve nga trotuaret e bulevardit “Dëshmorët e Kombit”, pas protestave të dhunshme në kryeqytet.
Fillimisht, gurët po hiqen me anë të një eskavatori, ndërsa më pas punonjësit e bashkisë se Tiranes kanë nisur t’i largojnë një nga një duke ia hequr “armet” nga duart protestuesve.
Gurët u kthyen në një prej mjeteve kryesore të përdorura nga protestuesit gjatë përplasjeve të ashpra me forcat e policisë, të shoqëruara me akte dhune para Kryeministrisë dhe zona të tjera të kryeqytetit.
Për të gjashtën herë, studentë, prindër, fëmijë e të moshuar pritet të mbushin rrugët e Tiranës, pasi siç e kanë njoftuar dhe gjerësisht në rrjet tubimi i radhës do të mbahet mesditën e sotme. Ndërkohë, disa fadroma janë parë duke hequr gurët në bulevardin “Dëshmorët e Kombit”, në mënyrë që të rinjtë të mos lëndojnë efektivët.
Prej ditësh, fëmijë e të rritur janë para duke shkulur pllakat e gurët e trotuarëve, me të cilët kanë “shënjestruar” efektivët që janë në krye të detyrës në terren, ku shumë prej tyre kanë marrë lëndime të rënda në trup. Për këtë situatë shprehu shqetësimin e tij dhe kryeministri Edi Rama, i cili mëngjesin e kësaj të diele theksoi se policët nuk duhen dhunuar duke shtuar se ata vetëm po bëjnë detyrën e tyre.
Protesta studentore, eskaloi ditën e djeshme, pasi të rinj të maskuar vijuan me shkatërrimin e hapësirave publike e jo vetëm. Mbrëmjen e djeshme, disa prej tyre janë bërë bashkë duke i vënë flakën Gjykatës së Lartë, e sërish dhe disa bizneseve private.