Pamje prekëse janë bërë virale në rrjetet sociale, ku një burrë dyshohet se ka ndërruar jetë gjatë faljes në një xhami në Malajzi. Kamerat e sigurisë kanë regjistruar momentet kur besimtari përpiqet të ngrihet nga sexhdja, por nuk ia del dhe mbetet i palëvizur, ndërsa personat e tjerë vazhdojnë faljen.
Sipas raportimeve të mediave, përfshirë Al Jazeera dhe mediat malajziane, ngjarja dyshohet se ka ndodhur në xhaminë Xhamek Al Takwa, në zonën Bakri të qytetit Muar, në shtetin Johor, në jug të Malajzisë.
Në pamjet e kamerave të sigurisë shihet burri, i veshur me një këmishë të kuqe, duke marrë pjesë në faljen në grup. Në momentin kur besimtarët e tjerë ngrihen për të vijuar me fazën tjetër të lutjes, ai përpiqet të ngrihet, por nuk arrin ta përfundojë lëvizjen.
Në vend të kësaj, ai ulet sërish në pozicionin e sexhdes dhe qëndron pa lëvizur.
Besimtarët e tjerë vazhdojnë faljen dhe, sipas pamjeve, i afrohen burrit vetëm pasi përfundojnë lutjen, për të parë se çfarë ka ndodhur dhe për t’i dhënë ndihmë.
Reagime të shumta në rrjetet sociale
Videoja është shpërndarë gjerësisht në rrjetet sociale, duke ngjallur reagime të shumta mes përdoruesve.
Një përdorues me emrin Ahmad Haris, i cili publikoi pamjet në platformën Threads më 19 tetor, e shoqëroi videon me një mesazh prekës për rrethanat në të cilat dyshohet se humbi jetën besimtari.
“Një vdekje që mund të ngjallë zili. Allahu e zgjodhi në momentin kur ai po binte në sexhde para Tij”, shkroi ai, duke shprehur gjithashtu ngushëllimet për familjen e të ndjerit.
Në të njëjtin postim, ai shtoi edhe lutjen: “O Allah, na dhuro një përfundim të mirë kur të vdesim”.
Pamjet kanë prekur shumë besimtarë myslimanë, të cilët e kanë cilësuar këtë si një “vdekje të bekuar”, duke iu referuar rëndësisë së veçantë që ka falja në besimin islam.
Megjithatë, disa përdorues kanë ngritur pikëpyetje për faktin se të pranishmit nuk e ndërprenë menjëherë faljen kur burri mbeti i palëvizur.
Çfarë simbolizon sexhdja në Islam?
Sexhdja është një nga pjesët kryesore të faljes islame dhe simbolizon përulësinë, nënshtrimin dhe përkushtimin e besimtarit ndaj Allahut.
Për këtë arsye, disa përdorues të rrjeteve sociale i kanë cilësuar rrethanat e dyshuara të vdekjes së burrit si një “përfundim të bekuar”, pasi ai besohet se ndërroi jetë gjatë një akti të rëndësishëm adhurimi.
https://x.com/nexta_tv/status/2113605772668019169/video/1