Një aksident i rëndë ka ndodhur mëngjesin e sotëm, rreth orës 08:30, në dalje të Vorës, në periferi të Tiranës. Si pasojë e përplasjes së tre automjeteve, ka humbur jetën drejtuesi i njërit prej mjeteve, 35-vjeçari Flobert Ajazi.
Dy automjete të tjera, të drejtuara nga shtetasit B.G. dhe F.H., u përfshinë në këtë përplasje tragjike. Dy pasagjerë që ndodheshin në makinën e viktimës kanë mbetur të plagosur dhe janë transportuar me urgjencë në spital, ku ndodhen nën kujdesin intensiv të mjekëve.
Grupi hetimor ka mbërritur menjëherë në vendngjarje dhe po punon për të zbardhur shkaqet dhe rrethanat e këtij aksidenti. Fatkeqësia ka shkaktuar kaos në trafikun e zonës, ndërsa policia po menaxhon situatën dhe po mbledh prova për të rindërtuar dinamikën e ngjarjes.
“Rreth orës 08:30, në dalje të Vorës, janë përplasur automjetet me drejtues shtetasit B. G., F. H. dhe F. A.. Si pasojë, ka humbur jetën shtetasi F. A., 35 vjeç dhe janë dëmtuar 2 pasagjerë në automjetin që drejtonte ai. Të dëmtuarit janë transportuar në spital, ku janë në kujdesin e mjekëve. Grupi hetimor po punon për sqarimin e rrethanave të aksidentit”, njoftoi policia.
