Kryeministri Edi Rama ka ndryshuar dukshëm tonin politik ndaj Erion Veliajt, kryebashkiakut të Tiranës që ndodhet prej gati një viti në paraburgim. Në një deklarim publik, Rama jo vetëm që vuri në dyshim arsyet e ndalimit të Veliajt, por u rreshtua hapur në mbrojtje të tij, duke e cilësuar rast tipik të “paraburgimit pa gjyq” dhe të një sistemi drejtësie që, sipas tij, abuzon me masat ndëshkimore.
Ky qëndrim vjen pasi tentativa e Ramës për të zëvendësuar Veliajn me një kryetar të komanduar dështoi, pas vendimit të Gjykatës Kushtetuese se “Tirana ka një kryebashkiak në detyrë”. Pamundësia për ta larguar nga posti duket se ka çuar drejt një riformatimi politik të qëndrimit të kryeministrit.
“Është i kyçur në qeli pa gjyq, ndërkohë vazhdon kërkimi i provave. Unë akoma nuk e kam marrë vesh se çfarë ka bërë konkretisht. Korrupsion në kuptimin e fjalës nuk kam parë”, tha Rama, duke e krahasuar rastin e Veliajt me atë të Hashim Thaçit dhe me kryetarin e bashkisë së Tropojës.
Kryeministri kritikoi statistikat e larta të paraburgimeve në Shqipëri, duke theksuar se vendi ka 94 të paraburgosur për çdo 1 000 banorë, ndërsa, sipas tij, vende si Belgjika kanë shumë më pak, megjithëse me kriminalitet më të lartë. Rama ngriti pyetjen se “çfarë ndodh nëse Veliaj del i pafajshëm” dhe kush mban përgjegjësi për kohën e kaluar në paraburgim.
Në një pasazh ku retorika e tij mori ngjyrë politike dhe simbolike, Rama u ankua se edhe pse Tirana “në letër ka kryetar bashkie”, në realitet qyteti drejtohet në mungesë të autoritetit të zgjedhur. “E bëra një provë që t’i jepnim Tiranës një kryetar bashkie, nuk funksionoi. GJK tha se Tirana e ka një kryetar… po ku e ka?”, u shpreh ai.
Pse Rama po i del tani në mbrojtje Veliajt?
Ky pozicionim i ri ngre disa lexime politike:
Rama duket se po vendos distancë nga përgjegjësia direkte për fatin e Veliajt dhe ia faturon situatën sistemit të drejtësisë.
Ai dërgon një mesazh se nuk dëshiron përplasje të hapur me strukturat gjyqësore, por njëkohësisht kritikon praktikën e paraburgimit si normë.
Në planin politik, mbrojtja ndaj Veliajt mund të shihet si sinjal stabilizimi brenda mazhorancës, pasi një përplasje frontale me të do të prodhonte tension elektoral në kryeqytet.
Një tjetër interpretim është se Rama frikësohet nga pasoja politike e një skenari ku Veliaj del i pafajshëm pas një periudhe të gjatë paraburgimi.
Kryeministri, për herë të parë në një deklaratë publike, la të nënkuptohet se rasti Veliaj mbetet i paqartë edhe për të vetë:
“Unë akoma nuk e kam kuptuar çfarë ka bërë”, – tha ai, duke hapur një debat të ri mbi raportin midis politikës dhe drejtësisë.
Ndërkohë, Tirana vijon të drejtohet pa kryetar të pranishëm fizikisht, ndërsa proceset gjyqësore ndaj Veliajt mbeten të hapura dhe pa një afat të përcaktuar.