Një projektligj i ri në Shtetet e Bashkuara po shkakton debate të forta mbi të drejtat e emigrantëve, pasi synon t’i detyrojë të gjithë aplikantët për shtetësi amerikane të japin testin e natyralizimit vetëm në gjuhën angleze. Propozimi, i paraqitur nga përfaqësuesi republikan Randy Fine, do të eliminonte përjashtimet ekzistuese për personat e moshuar.
Çfarë ndryshon projektligji?
Aktualisht, ligji amerikan ofron lehtësira për disa grupe emigrantësh:
- Personat mbi 50 vjeç me të paktën 20 vjet rezidencë në SHBA.
- Personat mbi 55 vjeç me 15 vjet rezidencë.
Këta individë mund ta japin provimin e edukatës qytetare në gjuhën e tyre amtare me ndihmën e një përkthyesi. Projektligji i Fine do ta anulonte këtë mundësi, duke kërkuar njohuri të detyrueshme të gjuhës angleze për të gjithë, pavarësisht moshës apo kohës së kaluar në vend.
Fine argumentoi për “Fox News Digital” se përdorimi i përkthyesve “minon idenë e asimilimit në kulturën amerikane”. Ai theksoi se “nëse doni të jetoni në një vend anglishtfolës, duhet të jeni në gjendje të flisni anglisht dhe pikë”.
Ky propozim vjen disa muaj pas urdhrit ekzekutiv të ish-presidentit Donald Trump, i cili e shpalli anglishten gjuhë zyrtare të vendit. Grupet e avokatisë së emigrantëve kanë reaguar ashpër, duke e cilësuar projektligjin diskriminues dhe në dëm të emigrantëve të moshuar, shumë prej të cilëve kanë kontribuar ndaj shoqërisë amerikane për dekada.