Ish-ministri i Financave, Arben Malaj, ishte i ftuar në emisionin “Off the Record” ku rrëfeu një moment tensionesh të forta brenda PS-së në vitin 2008, kohë kur u miratuan ndryshimet kushtetuese. Malaj tha se këto ndryshime hodhën farën e partive autoktratike.
Ish-ministri tregoi për një mbledhje të gjatë me Edi Ramën të cilit i kërkoi që ndryshimet të shoqëroheshin me opinione profesionale nga ekspertë të së drejtës kushtetuese.
Kjo kërkesë nuk u mor parasysh, ndaj ai refuzoi t’i votonte ndryshimet, të cilat sot i konsideron si pikënisje e dobësimit të demokracisë së brendshme të partive.
Kritikat e Arben Malajt ndaj Edi Ramës nuk ishin të pakëta ndërsa theksoi se gjatë qeverisjes së tij, kryeministri nuk ka dashur të dëgjojë pavarësisht problemeve të qarta të qeverisjes.
Sa i përket çështjes së dorëheqjeve të zyrtarëve nën hetim, Malaj solli shembullin e ish-ministrit Luan Rama, i cili u largua për shkak të presionit publik pas një incidenti me gazetarët.
Në këtë kontekst, ai theksoi se integriteti është test i vërtetë në kohë krize dhe se Rama duhet të vendosë standarde të qarta, sidomos kur bëhet fjalë për ministra nën hetim, raporton A2CNN.