Situata në rajon vijon të përshkallëzohet, ndërsa raportohet se dronë iranianë kanë rënë në rajonin e Nakhiçevanit në Azerbajxhan.
Sipas mediave lokale, një nga objektivat e goditur dyshohet të jetë aeroporti i këtij rajoni autonom, duke shkaktuar alarm dhe duke rritur tensionet në zonë.
Nakhiçevani është një rajon strategjik i Azerbajxhanit, i ndarë nga pjesa tjetër e vendit dhe i vendosur pranë kufijve me Iranin, Turqinë dhe Armeninë. Sulmi i raportuar konsiderohet si një zhvillim i rëndësishëm që mund të zgjerojë më tej hartën e vendeve të përfshira nga sulmet e lidhura me konfliktin në Lindjen e Mesme.
Deri në këto momente nuk ka një konfirmim zyrtar nga autoritetet për dëme apo viktima, ndërsa situata në rajon po monitorohet nga forcat e sigurisë.
Sulmi i raportuar në Nakhiçevan vjen në një kohë kur tensionet mes Iranit, Izraelit dhe aleatëve të tyre janë përshkallëzuar ndjeshëm, duke rritur frikën për përhapjen e konfliktit edhe në rajone të tjera.