TIRANË — Një përleshje masive ka shpërthyer në Aeroportin Ndërkombëtar të Tiranës, Rinas, në orët e para të mëngjesit të 6 shtatorit. Konflikti ndodhi gjatë imbarkimit të pasagjerëve të një çarteri për në Antalia, kur një familje e madhe kërkoi të kalonte pa radhë, duke shkaktuar kaos.
Sipas Policisë së Shtetit, familja e përbërë nga rreth 18 persona, përfshirë fëmijë të mitur, kërkoi përparësi për shkak të fëmijëve. Kjo kërkesë shkaktoi një përplasje të ashpër me stafin e aeroportit.
Situata doli jashtë kontrollit, çka detyroi punonjësit e check-in të thërrasin forcat e Policisë së Rinasit. Pas ndërhyrjes së shpejtë të policisë, situata u normalizua dhe udhëtimi vijoi pa probleme të mëtejshme.
Policia njoftoi se askush nuk mbeti i lënduar nga incidenti. Kryefamiljari, shtetasi A.M., dhe djemtë e tij i kërkuan falje punonjësve, të cilët vendosën të mos bënin kallëzim penal. Për shkak të reflekseve pozitive të tyre dhe pranisë së fëmijëve, Policia Kufitare i këshilloi dhe i lejoi të vazhdonin udhëtimin.
Policia mohoi gjithashtu pretendimet se familja e përfshirë në konflikt kishte lidhje familjare me shtetasin Xh. Q.