Moti në Shqipëri ka shënuar një ndryshim të papritur, duke sjellë sot dëborën e parë të sezonit, një fenomen aspak i zakontë për muajin tetor. Lidhur me këto luhatje, meteorologia Lajda Porja, e ftuar në emisionin “Wake Up”, ka shpjeguar se çfarë pritet në ditët në vijim.
Sipas parashikimit të saj, ky mot do të jetë i shkurtër dhe do të pasohet nga një rritje e ndjeshme e temperaturave.
Parashikimi afatshkurtër: Mot dimëror dhe dëbora e parë
Meteorologia Porja theksoi se deri të dielën, moti do të ketë më shumë karakteristika dimri sesa vjeshte. Nesër parashikohen temperatura të ulëta, që do të zbresin deri në 2°C në zonat e ulëta, ndërsa në ato malore termometri do të shënojë 0°C.
Po ashtu, dëbora pritet të fillojë sonte në zonën veriore dhe verilindore, e nesër do të shtrihet edhe në juglindje. Kjo situatë do të shoqërohet me ngrica dhe stuhi të forta ere, të cilat do të jenë më problematike sot dhe nesër. Që nga dita e shtunë, intensiteti i erës do të fillojë të bjerë.
Rikthimi i temperaturave të larta javën tjetër
Megjithatë, ka një lajm të mirë për ata që nuk e pëlqejnë të ftohtin. Lajda Porja parashikon se ky “dimër i shkurtër” do të zgjasë vetëm deri të dielën, kur do të fillojë rritja e temperaturave. Ajo tha se javën tjetër priten temperatura deri në 27°C, duke sjellë një kthim të papritur të motit pothuajse veror.
Sa i përket fenomeneve të tjera, ajo theksoi se stuhitë tropikale janë aktive deri më 20 tetor, duke paralajmëruar se Shqipëria mund të përjetojë të paktën 1 ose 2 ngjarje të tjera të tilla, ndërsa Greqia do të përballet me stuhi dhe reshje më të shumta në ditët në vijim.
Përsa i përket parashikimit afatgjatë për dimrin, Porja u shpreh se ai do të jetë i cunguar dhe numri i ditëve të acarta do të jetë i pakët, ndërkohë që periudha më e ftohtë pritet të jetë janari dhe disa ditë të shkurtit.