Një meteor ka shkaktuar panik në Gjermani, pasi trupi qiellor ka rënë mbi çatinë e një shtëpie në qytetin Koblenz, duke shkaktuar dëme materiale.
Sipas raportimeve të ZDF Heute, meteori përshkoi çatinë e ndërtesës dhe përfundoi në një dhomë gjumi, por fatmirësisht në atë moment nuk ndodhej askush brenda, duke shmangur një tragjedi të mundshme.
Policia njoftoi se nga ngjarja nuk pati persona të lënduar, ndërsa dëme të vogla u raportuan edhe në zonat përreth Hunsrück dhe Eifel.
Një zëdhënës i forcave të rendit tha për Agjencinë Gjermane të Shtypit (dpa) se nuk ka rrezik të mëtejshëm, megjithatë ngjarja shkaktoi momente ankthi tek banorët e zonës.
Dëshmitarë okularë raportuan se panë një objekt të ndritshëm që përshkonte qiellin, i cili krijoi frikë dhe shumë spekulime në rrjetet sociale. Disa përdorues madje pyetën nëse mund të bëhej fjalë për një raketë iraniane.
Shkencëtarët shpjegojnë se kur një asteroid hyn në atmosferën e Tokës, ai zakonisht copëzohet. Shumica e fragmenteve digjen gjatë rënies, por disa arrijnë në tokë dhe njihen si meteoritë.
Ngjarja la të tronditur shumë banorë të Gjermanisë perëndimore, të cilët panë në qiell një lëmsh të zjarrtë përpara se objekti të binte në tokë.