Janë publikuar pamje nga sulmi i fundit rus në Kiev, ku është dëmtuar edhe kompleksi rezidencial ku banon ambasadori shqiptar në Ukrainë, Ernal Filo. Në pamjet e siguruara shihen dëmtime të shumta në ndërtesa, si dhe zjarre të shkaktuara nga goditjet me raketa.
Sipas dëshmisë së ambasadorit, sulmi ka nisur rreth orës 22:00 dhe ka zgjatur deri në orët e para të mëngjesit, duke qenë një nga sulmet më intensive të kohëve të fundit.
“Sulmi nisi në orën 22:00 dhe zgjati deri në orën 07:00 të mëngjesit. Sulmet ishin intensive dhe u godit kompleksi ku unë banoj. Gjatë sulmeve u strehuam në bodrumet e sigurta, ku qëndruam deri në mëngjes.
Kompleksi ku unë jetoj është shumë pranë ambasadës. Ka pësuar dëme shumë të mëdha nga sulmet. Pashë vdekjen me sy!”, është shprehur Filo.
Autoritetet shqiptare dhe diplomatët në terren po ndjekin nga afër situatën, ndërsa vijojnë vlerësimet për dëmet e shkaktuara nga sulmi.