Elis Halili është përzgjedhur si kryebashkiak i përkohshëm i Vlorës, duke marrë këtë post pas dorëheqjes së papritur të Ermal Dredhës. Vendimi u mor gjatë mbledhjes së sotme të Këshillit Bashkiak të Vlorës, e cila nisi rreth orës 10:00 të paradites.
Procesi i votimit ishte i fshehtë dhe përfshiu tre kandidatë: Elis Halili, Klea Lalo dhe Irena Toshkallari. Pas numërimit të votave, Halili doli fitues, duke u bërë kështu drejtuesi i ri i bashkisë deri në zgjedhjet e ardhshme.
Një detaj i rëndësishëm i kësaj zhvillimi është se vetëm pak ditë më parë, Elis Halili ishte emëruar nënkryetar i bashkisë, disa minuta para se Ermal Dredha të paraqiste dorëheqjen e tij. Si nënkryetar, Halili ishte përgjegjës për menaxhimin e projekteve dhe infrastrukturës në qytet.
Përzgjedhja e tij vjen në një moment delikat për Vlorën, e cila po kalon një fazë të rëndësishme zhvillimi me projekte të shumta infrastrukturore. Tani, detyra e tij kryesore do të jetë garantimi i vazhdimësisë së punës së bashkisë dhe menaxhimi i qytetit deri në zgjedhjet e ardhshme lokale.