Policia Bashkiake e Tiranës ka nisur një aksion të gjerë për të çliruar hapësirat publike dhe rrugët kryesore të kryeqytetit nga automjetet e braktisura. Kjo nismë, e shpallur sot, synon të përmirësojë qarkullimin e automjeteve dhe të ndihmojë në rritjen e rregullsisë urbane, një problem i theksuar prej kohësh në Tiranë.
Në një njoftim zyrtar, Policia Bashkiake u bëri thirrje pronarëve të makinave të braktisura që t’i largojnë vullnetarisht mjetet e tyre. Në të kundërt, Policia paralajmëroi se do të ndërhyjë me karrotrec për t’i hequr makinat, duke penalizuar pronarët me gjoba të majme.
“Policia Bashkiake Tiranë ka nisur procesin e njoftimit për mjetet e braktisura, të cilat kanë zënë hapësirat publike dhe rrugët e kryeqytetit. Pronarët ose poseduesit e mjeteve ftohen të kryejnë heqjen vullnetare, për të shmangur procedurat administrative dhe për të kontribuar në një qytet më të pastër,” thuhet në njoftim.
Autoritetet kanë vënë në dispozicion edhe një numër telefoni, 0689500030, duke i ftuar qytetarët të bëhen pjesë e këtij aksioni. Ata mund të dërgojnë foto dhe lokacionin e automjeteve të braktisura, duke ndihmuar kështu Policinë Bashkiake të identifikojë dhe të ndërhyjë me shpejtësi. Kjo lëvizje tregon një qasje të re të bashkëpunimit mes autoriteteve dhe qytetarëve për të zgjidhur problemet e mobilitetit dhe estetikës në kryeqytet.