Spitali Universitar i Traumës në Tiranë ka humbur një nga mjekët e tij më të respektuar, Fatos Bakiasi, i cili ndërroi jetë papritur në moshën 62-vjeçare. Humbja e tij e parakohshme ka lënë një boshllëk të madh në zemrat e familjarëve, miqve dhe kolegëve me të cilët ai ndante pjesën më të madhe të ditës.
Fatos Bakiasi, i njohur për përkushtimin dhe profesionalizmin e tij, ishte një nga figurat kryesore të spitalit. Vetëm një ditë para ndarjes nga jeta, më 13 shtator, ai kishte qenë në punë, duke kryer detyrën e tij me zell dhe duke u ofruar ndihmë mjekësore pacientëve.
Një nga kolegët e tij, Flora Mezini Boja, shprehu trishtimin e thellë në një postim në rrjetet sociale, duke e përshkruar Bakiasin si një “njeri të dashur, një koleg shembullor, një profesionist që nderoi bluzën e bardhë dhe spitalin e Traumës”. Ajo theksoi se mungesa e tij e papritur është një humbje e madhe për të gjithë. “Do të kujtohesh për gjithçka që ndërtove me përkushtim, me dashuri për jetën dhe respekt për të tjerët,” shkroi ajo.
Vdekja e mjekut Bakiasi ka prekur thellë komunitetin mjekësor dhe të gjithë ata që e njohën. Ai do të mbahet mend si një profesionist i palodhur dhe një njeri i mirë që i shërbeu me zemër profesionit të tij.
