Këshilli i Lartë i Prokurorisë (KLP) ka njoftuar se do të hapë zyrtarisht garën për postin drejtues të Prokurorisë së Posaçme (SPAK) më 17 shtator. Ky proces vjen pasi mandati i drejtuesit aktual, Altin Dumani, pritet të përfundojë në fund të vitit.
Sipas burimeve të “CNA”, katër prokurorë janë emrat më të përfolur si kandidatë potencialë për të marrë drejtimin e këtij institucioni kyç të drejtësisë.
- Adnan Xholi: Një nga emrat më të lakuar, ai shihet si një figurë e afërt me Dumanin, duke qenë shpesh në krah të tij në takimet dhe komisionet publike.
- Vladimir Mara: Një tjetër prokuror i njohur i SPAK-ut, firma e të cilit qëndron në disa dosje dhe arrestime me bujë.
- Klodian Braho: Prokurori që ka hetuar dosje të rëndësishme si “5D” dhe çështjen e inceneratorit të Elbasanit.
- Anita Jella: Një prokurore me integritet të lartë, e cila, nëse zgjidhet, do të bëhej gruaja e parë në krye të SPAK-ut.
Zgjedhja e drejtuesit të ri të SPAK-ut pritet të jetë një proces i rëndësishëm, duke marrë parasysh rëndësinë e këtij institucioni në luftën kundër krimit dhe korrupsionit në Shqipëri.