Hetimet për vrasjen e biznesmenit të njohur Mondi Mëhalla kanë hyrë në një fazë të re, pasi policia e Elbasanit ka shoqëruar një person të dyshuar si të lidhur drejtpërdrejt me ekzekutimin. Burime policore bëjnë me dije se në pranga është shoqëruar Naldo Gjini, emër që po verifikohet intensivisht nga grupi hetimor.
Sipas informacioneve paraprake, Gjini dyshohet se ka qenë përdoruesi i fundit i automjetit tip “Audi”, i cili u identifikua si makina e përdorur gjatë atentatit që i mori jetën biznesmenit Mëhalla disa ditë më parë.
Pamjet e siguruara nga kamerat e sigurisë në Rrugën e Kombit kanë fiksuar momentin kur ai ka kryer pagesën në trau, duke udhëtuar me mjetin në fjalë.
Në vijim të veprimeve operative, policia po ushtron kontroll të imtësishëm në banesën e tij, me qëllim sekuestrimin e çdo prove të mundshme që mund të ndihmojë zbardhjen e plotë të ngjarjes së rëndë.
Ngjarja mbetet ende nën hetim të thelluar, ndërsa autoritetet janë në pritje të rezultatit të ekspertizave të tjera teknike për të krijuar një tablo të qartë mbi rolin e të dyshuarit dhe motivet e mundshme të krimit. Hetimet vazhdojnë.