Një shpërthim i fuqishëm në një strukturë të paligjshme për prodhimin e kokainës në jugperëndim të Kolumbisë, pranë kufirit me Ekuadorin, ka shkaktuar vdekjen e nëntë personave dhe plagosjen e dhjetë të tjerëve.
Sipas Policisë kolumbiane, ngjarja ndodhi në orët e para të 23 janarit. Shefi i policisë, John Hero Urea Rosso, bëri të ditur se shpërthimi u shkaktua nga një bombol gazi, e cila detonoi gjatë procesit të përgatitjes së drogës.
Laboratori i paligjshëm ishte i vendosur në një komunitet indigjen në departamentin Nariño, një zonë e njohur për kultivimin e gjerë të kokës dhe për praninë e grupeve të armatosura ilegale.
Autoritetet sqaruan se viktimat ishin persona që punonin për një fraksion disident të ish-grupit gueril FARC, i cili nuk iu bashkua marrëveshjes së paqes të nënshkruar në vitin 2016.
