Pas protestës para Kryeministrisë, qindra qytetarë vazhdojnë marshimin në rrugët e kryeqytetit. Revolta mbetet e palëkundur, ndërsa të rinjtë duken të vendosur të sfidojnë klasën e vjetër politike.
Edhe pse protesta para Kryeministrisë është mbyllur pas afro katër orësh, rrugët e Tiranës vijojnë të ziejnë nga qytetarët që kanë zgjedhur të mos kthehen në shtëpi, por të vazhdojnë marshimin në grup nëpër kryeqytet.
Me flamuj kuqezi, pankarta dhe thirrje të vazhdueshme, protestuesit po përshkojnë rrugët kryesore të Tiranës duke përsëritur sloganet që kanë dominuar gjatë gjithë javës: “Rama ik”, “Rama në burg”, “Berisha në burg”, “Shqipëri e re”, “Revolucion” dhe “Ju erdhi fundi”.
Atmosfera përgjatë marshimit është shoqëruar edhe me reagime të shumta nga qytetarët që nuk kanë qenë pjesë e protestës. Në shumë segmente të rrugës, kalimtarë dhe banorë kanë duartrokitur protestuesit nga trotuaret, ndërsa nuk kanë munguar as drejtues automjetesh që kanë ndaluar për pak çaste, kanë dalë nga makinat dhe i janë bashkuar brohoritjeve.
Të tjerë kanë rënë borive në shenjë mbështetjeje, ndërsa nga ballkonet dhe lokalet përgjatë itinerarit janë dëgjuar duartrokitje dhe thirrje inkurajuese për turmën që marshonte.
Pikërisht ky reagim spontan i qytetarëve përgjatë rrugëve të Tiranës po shihet si një tregues se pakënaqësia nuk kufizohet vetëm te ata që dolën në shesh, por është shumë më e gjerë. Për shumë prej pjesëmarrësve, protesta nuk ka më karakterin e një tubimi të zakonshëm, por të një revolte qytetare që po fiton mbështetje dita-ditës.
Në krye të marshimit shihen kryesisht të rinj, studentë dhe qytetarë të moshave të ndryshme, të cilët deklarojnë se janë të vendosur të mos tërhiqen derisa zëri i tyre të dëgjohet. Mesazhi që përcillet gjatë ecjes është i qartë: kërkesë për ndryshim politik, fund të pandëshkueshmërisë dhe largimin e figurave që kanë dominuar jetën politike shqiptare për dekada.
Ndërsa mbrëmja avancon, turma vijon të lëvizë në rrugët e kryeqytetit mes brohoritjeve dhe duartrokitjeve të qytetarëve, duke treguar se energjia e protestës nuk është shuar me mbylljen e tubimit para Kryeministrisë. Përkundrazi, revolta duket më e vendosur se kurrë për të vazhduar betejën e saj kundër establishmentit politik.