Një ngjarje tronditëse ku katër punëtorë migrantë u sulmuan në një pikë karburanti, në një rast që ka rikthyer në qendër të vëmendjes fenomenin e shfrytëzimit të punëtorëve të huaj në sektorin bujqësor
Sipas autoriteteve viktimat ishin tre shtetas afganë dhe një shtetas pakistanez, të cilët dyshohet se u sulmuan ndërsa ndodheshin brenda një automjeti në një pikë karburanti në pranë qytetit
Prokuroria italiane ka bërë të ditur se për rastin janë arrestuar dy shtetas pakistanezë, të dyshuar për veprën penale të vrasjes së rëndë.
Pamjet e kamerave zbardhin ngjarjen
Sipas mediave italiane, kamerat e sigurisë kanë regjistruar momentin kur të dyshuarit i afrohen automjetit, hedhin lëndë djegëse në pjesën e pasme të tij dhe më pas i vënë flakën. Hetuesit dyshojnë se dyert e automjetit janë bllokuar me qëllim që personat brenda të mos arrinin të largoheshin.
Nga pesë personat që ndodheshin në automjet, vetëm një shtetas afgan arriti të shpëtojë, duke dalë përmes bagazhit të veturës. Ai pësoi djegie në krahë dhe po trajtohet në spital.
“Është mrekulli që jam gjallë”
I mbijetuari, i cili punonte si mbledhës luleshtrydhesh dhe banonte me viktimat, ka dhënë një dëshmi tronditëse për mediat italiane.
Ai pretendon se autorët ishin pjesë e një rrjeti kriminal dhe se ai bashkë me viktimat ishin detyruar të punonin pa pagesë.
“Është mrekulli që jam gjallë,” është shprehur ai.
Sipas dëshmisë së tij, punëtorët ishin kërcënuar me armë zjarri dhe thika, ndërsa shpërblimi i vetëm për punën e tyre ishte ushqimi dhe një vend për të fjetur.
Shfrytëzimi i punëtorëve migrantë nën hetim
Rasti ka rikthyer vëmendjen te fenomeni i njohur në Itali si “caporalato”, një sistem i paligjshëm përmes të cilit ndërmjetës kriminalë rekrutojnë punëtorë migrantë për paga shumë të ulëta dhe në kushte të rënda pune.
Autoritetet italiane prej vitesh po përpiqen ta luftojnë këtë fenomen, i cili prek mijëra punëtorë sezonalë në sektorin e bujqësisë.
Reagime të forta në Itali
Ngjarja ka shkaktuar reagime të shumta në Itali.
Nënkryetari i Konferencës së Ipeshkvijve Italianë, Francesco Savino, e cilësoi rastin si një ngjarje që “trondit besimin te njerëzimi”, duke bërë thirrje për një reagim të fortë kundër shfrytëzimit të punëtorëve dhe indiferencës së shoqërisë.
Edhe sindikata më e madhe italiane CGIL e përshkroi ngjarjen si “një tmerr të papërshkrueshëm”, duke kërkuar masa më të ashpra për mbrojtjen e punëtorëve migrantë.
Presidenti i rajonit të Kalabrisë, Roberto Occhiuto, publikoi pamjet e kamerave të sigurisë në rrjetet sociale dhe deklaroi se bëhet fjalë për një ngjarje që ngre pyetje serioze mbi dinjitetin njerëzor dhe mbrojtjen e personave më të pambrojtur.
Italia përballë sfidës së shfrytëzimit të punëtorëve
Shumë punëtorë migrantë mbërrijnë në Itali me shpresën për një jetë më të mirë, por një pjesë e tyre bien pre e rrjeteve kriminale që i shfrytëzojnë në sektorin bujqësor.
Pas rasteve të bujshme të viteve të fundit, qeveria italiane ka shtuar kontrollet ndaj fermave dhe punëdhënësve, si dhe ka zgjeruar numrin e vizave të punës për shtetasit nga vendet jashtë Bashkimit Evropian.
Megjithatë, organizatat e punëtorëve dhe sindikatat vazhdojnë të kërkojnë masa më të forta për çrrënjosjen e shfrytëzimit të punëtorëve migrantë dhe ndëshkimin e rrjeteve kriminale që veprojnë në këtë sektor.
Autoritetet italiane kanë nisur hetimet për zbardhjen e plotë të ngjarjes, ndërsa dy të arrestuarit pritet të dalin para drejtësisë në ditët në vijim.