Një fluturim nga Guernsey drejt Mançesterit u detyrua të ndërpriste udhëtimin dhe të kryente një ulje emergjente parandaluese pasi gjatë fluturimit u konstatua thyerje në xhamin e avionit.
Bëhet fjalë për fluturimin GR678 të kompanisë Aurigny Air Services. Sipas kompanisë ajrore, ekuipazhi vuri re një thyerje në xhamin e avionit ndërsa ndodhej në ajër dhe, në përputhje me procedurat standarde të sigurisë, vendosi të devijojë drejt aeroportit të Southamptonit.
Avioni kishte nisur rrugën drejt Mançesterit, por bëri kthim mbi zonën e Basingstoke në Hampshire, pak kohë pas nisjes së udhëtimit që zgjat rreth një orë.
Në një deklaratë zyrtare, kompania konfirmoi se ulja u krye si masë paraprake dhe se të gjithë pasagjerët dhe anëtarët e ekuipazhit janë të sigurt dhe pa probleme shëndetësore.
“Siguria e pasagjerëve dhe e ekipit tonë mbetet prioriteti kryesor”, theksoi kompania, duke falënderuar udhëtarët për mirëkuptimin.
Pas uljes në Southampton, Aurigny organizoi transport me autobusë për pasagjerët deri në Mançester. Ndërkohë, për fluturimin e kthimit drejt Guernsey u përdor një avion tjetër.